今日重點話題真係iPHONE 4，
老實講，白色真係好靚。XD

至少佢d功能，
500萬像既相機，同我部電話一樣，
HD錄影，我部數碼相機都係高清...
另外wifi，email等大部分既功能，
真係我部iTOUCH一樣做到佢重要講到明遲d會出update程式比你更新你個iPHONE 3Gs/iTOUCH，
咁我買黎做咩呢？(喂)
不過白色真係好靚..
而我又真係好想要白色既手機！XD
但係認真d講句，自從買左數碼相機之後，
我對手機呢樣野，真係換既話就唔係為功能要係為個款，
白色係好靚，除左佢係白色之外，
又真係同iTOUCH真唔多，
最多就係佢既畫面比普通手機優勝幾10倍以上。
雖然見到個樣係心動，
至於買定唔買，真係需要睇價錢。XD

就這樣。

我發覺今個學期真係走左好多次火警..
上個學期明明除左演習之外都冇試過...
我記得4月已經起碼走左5次，(因為有一日朝早連續走3次)
跟住5月又有一,兩次，
去到6月，琴晚一次，今日一次。
真係走到我...我想搬到對面幢樓住..(喂)
因為對面都係STUDIO黎嫁~XD
大家都係住STUDIO點解要咁對我地呢幢呢？
而且個警鐘好大聲，
每次響都嚇到成個彈起心跳加速，
好彩心臟冇咩野又冇高血壓je，
如果唔係真係好易心臟病發嫁...

明明今朝訓醒好開心，見到藍天白雲，
真係兩個星期冇見過咁燦爛既陽光嫁，
不過而+又開始烏雲密佈啦~
呢兩個星期真係冇一日係冇落雨，
大大小小都會至少落1次~
唔知今日夜少少會唔會落呢？

今日想講返琴日拎到既AChE GROUP REPORT同埋 MM REPORT~
真係好．開．心．呀...=3=
40分滿分，AChE個份只係得21分ja...
GROUP REPORT呢樣野，PARTNER真係要選擇得好小心！
份REPORT分 3 PARTS，
我同JOYCE兩個做PART 3，(因為得好少時間，只有兩星期做)
然後有兩個外國一男一女每人做一PART，
因為個兩PART係學期中做左已經做左實驗，
其實大把時間做，點知做PART 2 個傻仔慢吞吞，
好似食左幾擔豬油咁，
亂咁黎，INTRODUCTION寫d唔寫d，
DISCUSSION 同 CONCLUSION 直頭唔寫...
佢又做得慢wo，
我地另外兩個PARTS寫好晒，
佢就交個日4點幾先做完，咁就自然係佢交嫁啦，
結果我地都唔知佢做漏左咁多野，
最後扣到得21分。
所以呢，唔係外國人英文好就一定REPORT拎高分嫁。

就這樣。

六四事件...其實唔係太關我事..XD
畢竟都過左去咁耐，
而且香港同中國大陸相比，
真係已經民主同文明好多。
生係香港人已經算幸運。
I'm pround of being Hong Konger..=)

今日係我大學生涯既最後一日..應該係。XD
不過今日得一堂，
重要識既人都唔返。
我本來都唔想返嫁~
落好大雨，有雨靴都只係保護到對腳，
個身條褲都濕晒。
最近真係每日至少落一次雨，
但係落極都重有雨真係好犀利~
琴晚又係勁大雨，係咁落到而+。
完全吸收唔到陽光進行唔到光合作用。(？)

聽日開始放大假~
放足兩星期先考試，
21/06開始考~
星期一一科，星期二一科，
星期五考兩科~=3=
感覺上時間好充足，
然後我就係會係咁hea到最後兩日先認真溫書既人。
呢個幾乎係每個學期都發生既事。XD
今年又係要打天才波？
應該﹑大概﹑盡量唔會..呱？(喂)
今次要保險d，唔輸得呀嘛。XDDDD
不過有句成語真係好真，力不從心呀。(逃)

就這樣。

今日打左兩個日記，
冇辦法啦，因為今日睇左幾集談情說案有野想講，
但係上一個日記太抒情feel，
唔岩我打口語化既野。(喂)
上一個日記之所以會出現係因為我又好無聊係到睇相，
原來我第一次去澳洲就係6月尾既時候，
6月真係一個好特別，好有決定性既月份，
而且又係岩岩好一年既一半，
可以話過左半年，亦都可以話重有半年，
同半杯水既道理一樣。=]

講返談情說案先~
好好笑呀犀利妹個二哥，
第一次見面係咁握住PRO生既手，
重有攬佢條腰，
之後每次見面都係咁握住PRO生既手，
真係睇到我呢...忍唔住諗其實呢個角色係唔係同性戀嫁？XD
重有LO SIR個鴛鴦排都好好笑。
談情說案雖然係咁比人話佢抄咖利略，
不過日劇真係好統一，
佢係查案既就查案，純愛劇就純愛劇，
好少會成日加d咁好笑既情節。XD
雖然談情說案又真係抄左人地既背景設定，
但係除此之外其實我覺得都ok，
比我既感覺係幾港式既電視劇~可能我少追港劇啦~XD

岩岩換埋BG，
早幾日我部電腦都已經出唔到d圖，
我初初以為係XANGA問題，
個幾日會出到，
不過到今日都見唔到d圖，
就決定換左佢啦~=]

就這樣。